ტელეკომპანია „მთავარის“ ინფორმაციით, სასტუმრო „ვინოტელის“ მფლობელი კორონავირუსის დიაგნოზით კლინიკაში იმყოფება. ის ფლობს ინფორმაციას, ვისგან გადაედო ვირუსული ინფექცია.
ცნობილია, რომ თანაინვესტირების ფონდის ინფიცირებული ხელმძღვანელი და სასტუმრო „ვინოტელის“ დამფუძნებელი ერთი ოჯახის წევრები არიან. ისინი საცხოვრებელი სახლიდან კლინიკაში კატასტროფის ბრიგადამ გადაიყვანა. სადარბაზოში დეზინფექცია უკვე ჩატარდა.
დაინფიცირებული პირი საზოგადოებას სიფრთხილისკენ მოუწოდებს. „მთავართან“ აცხადებს, რომ მეტი ყურადღება უნდა გამოეჩინა.
„ფრთხილად იყავით, მეტი ყურადღება უნდა გამომეჩინა. ვიცი, რომ მეორეული ინფიცირების გამო, კორონავირუსი მაქვს“ – ამბობს დაავადებული პირი.
ყველაფერი მოკლედ: რა ხდება საქართველოში კორონავირუსის გავრცელების დღიდან
18 მარტის მდგომარეობით, საქართველოში კორონავირუსი დაუდასტურდა 38 ადამიანს, მათ შორის 4 ბავშვია.
დადასტურებულ შემთხვევებს შორის ერთი, N1 ინფიცირებული უკვე გამოჯანმრთელდა და ის საავადმყოფოდან 14-დღიანი თვითიზოლაციის რეკომენდაციით გაწერეს. კარანტინის რეჟიმში რჩება 1 261 ადამიანი, სტაციონარში მეთვალყურეობის ქვეშ – 216.
დაავადებათა კონტროლის ცენტრის დირექტორის განცხადებით, ამ ეტაპზე სიტუაცია კონტროლდება, თუმცა, შესაძლოა, მომდევნო კვირას ინფექციის პირველწყარო ვეღარ დაადგინონ.
ჯანდაცვის მინისტრის განმარტებით, ასეთ შემთხვევაში, შესაძლოა, დაავადებულთა რაოდენობა 80-100-მდე გაიზარდოს და პიკური მომენტი დადგეს.
რაც შეეხება მოქმედ შეზღუდვებს, ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის.
ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული, მათ შორის, კაფე-ბარებსა და რესტორნებს.
აკრძალულია სამარშრუტო ტაქსების გადაადგილება და სრულად შეზღუდულია სპორტ დარბაზებისა და სპა ცენტრების ფუნქციონირება.
ასევე, 70 წელს ზევით მოქალაქეებს თვითიზოლაციაში დარჩენა ურჩიეს.
შეზღუდვები შეეხოთ ჟურნალისტებსაც, პარლამენტში მათ მხოლოდ კონკრეტული ლოკაციებიდან მუშაობის უფლება აქვთ, მთავრობის ბრიფინგებზე მათი დაშვება აიკრძალა. მედიები ბრიფინგის საერთო სიგნალს მიიღებენ და კითხვებს წინასწარ გაგზავნიან.
მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს.
ამ ეტაპზე იძულებით კარანტინშია გადაყვანილი 99 ადამიანი.
ამირან გამყრელიძე მოქალაქეებს მიმართავს, რომ თუ დავიცავთ კარანტინისა და თვითიზოლაციის წესებს, დამაზიანებელი ეფექტი მინიმალური გვექნება
ასევე საინტერესოა: კორონავირუსი საქართველოში – ვინ არიან დაინფიცირებულები
