ვიდეოკადრებში ჩანს, რომ ახალციხის სამედიცინო დაწესებულებაში ვაქცინაციისთვის ფლაკონი 11:40 საათზეა გახსნილი. რადგან საქმეში არსებული მასალებით გარდაცვლილი ექთნის აცრის დრო 12:13 წუთია მითითებული, ბაქრაძეების ოჯახის ადვოკატების ინფორმაციით, გამოდის, რომ 32-წუთიან ინტერვალში 10 ადამიანი უნდა აცრილიყო. თუმცა, უფლებადამცველების ინფორმაციით, ვაქცინის ფლაკონი მიმდინარე სისხლის სამართლის საქმეში ჩამატებული მტკიცებულების სახით არ არის და მოწმეთა ჩვენებები გარდაცვლილი ექთნის საქმეს ბუნდოვანს ხდის.
მეგი ბაქრაძის სისხლის ნიმუშზე, პარალელურად, კვლევა დაასრულა ლუგარის ლაბორატორიამ. ადვოკატების თქმით, გარდაცვლილ ექთანს ორგანიზმში მინიმალური ანტისხეულების რაოდენობა ჰქონდა, თუმცა უფლებადამცველების ინფორმაციით, გლდანი-ნაძალადევის მე-8 პოლიციის სამმართველოში გამოკითხვაზე პაატა იმნაძემ არც უარყო და არც დაადასტურა, მეგი ბაქრაძეს ჰქონდა თუ არა კორონავირუსი გადატანილი. დაავადებათა კონტროლის ცენტრის ხელმძღვანელის მოადგილე, გამოძიების დასრულებამდე, ჩატარებული კვლევის დეტალებს არ ასაჯაროებს და დუმილს ამჯობინებს.
