დადგა დუმილის დარღვევის დროც – ამის შესახებ სოსო გოგაშვილმა სოციალურ ქსელში დაწერა. სუსის უფროსის ყოფილი მოადგილე თემირლან მაჩალიკაშვილის საქმეზე გამოძიების შეწყვეტას გამოეხმაურა.
„ვანო, გილოცავ!!! იცოდე,შენს მიერ დაღვრილი სისხლი, რომელიც შენი ქვეყნის და შენი ოჯახის გადასარჩენად დაღვარე არ ყოფილა ტყუილად დაღვრილი, სასუფეველი დაგიმკვიდროს უფალმა გმირო, შეხვედრამდე ძმობილო.
სისხლის სამართლის საქმეები შეწყდა სუსის თანამშრომელების მხრიდან დანაშაულის არარსებობის გამო და ასევე ტერორიზმში ეჭვმიტანილის გარდაცვალების გამო. ასევე გრძელდება სისხლის სამართლის საქმე სხვა პირების შესაძლო მონაწილეობაში ტერორისტულ აქტებსა,თუ ტერორისტულ დანაშაულში.
ქვეყანას ავარიდეთ საშინელი სისხლიანი ტერორისტული აქტების სერია, განადგურდა მსოფლიოში საშიში ტერორისტები და ვინც გადაურჩა სიკვდილს ისინი ვერ გადაურჩნენ მართლმსაჯულებას, ასე იმარჯვებს სიმართლე!!!
წინაა სტრასბურგი, მაგრამ ეჭვი არ მეპარება, რომ იქაც იზეიმებს სიმართლე,რადგან ტერორისტი მსოფლიოს პრობლემაა და არა მარტო საქართველოსი.სიმართლე კი ერთია!
ახლა კი და დადგა დუმილის დარღვევის დროც, მე ვიწყებ ამ საქმის შესახებ ყველა არსებული მტკიცებულების და ფაქტების, რომელიც გამაჩნია, რომელიც არსებობს, თარგმნას და მომზადებას ჩვენს უცხოელ სტრატეგიულ პარტნიორებზე გასაგზავნად და პირადად გადასაცემად, ვაშინგტონიდან დაწყებული ბრიუსელით, სტრასბურგით და აშ დამთავრებული. რადგან ყველამ გაიგოს, როგორც საზღვარგარეთ ასევე საქართველოში, რომ ამ isis ის ტერორისტების უკან იდგნენ და დგანან საქართველოს “ მთავარი” ოპოზიციური პარტია ნაციონალური მოძრაობა.ეს არის ჩემი ახლანდელი მთავარი მიზანი, რომ ყველას დავანახო,რა დგას სინამდვილეში ამ პოლიტიკური პარტიის პოლიტმიზნების მიღწევის უკან და რა მეთოდებით ცდილობენ ისინი ხელისუფლებაში დაბრუნებას. ამას მე ყველას დავუგზავნი და გავაგებინებ. ასევე იგეგმება საერთაშორისო უსაფრთხოების, ანტიტერორისტული კონფერენციებს მოწყობა, უცხოელ ანალოტიკოსებთან ერთად, როგორც საქართველოს სხვადასხვა კუთხეებში, ასევე ევროპასა და ამერიკაში,სადაც გავაკეთებ პრეზენტაციებს და დავდებ ფაქტებს ნაცმოძრაობოს და isis-ის წევრი ტერორისტების ალიანსზე.
თქვენ აგზავნით ცრუ რეპორტებს და მაგრები გგონიათ თავი, ეხლა ნახავთ გოგაშვილს რა შეუძლია და რეპორტები როგორი უნდა იყოს ქვეყნის უსაფრთხოების დასაცავად და არა დასაღუპად…
ამას მალე გაგრძნობინებთ თქვე წურბელებო.
PS ასევე მივმართავ იმ რეპორტიორებს და ჟურნალისტებს ვისაც პრეტენზია გაქვთ, რომ ხართ პროფესიონალები და გაქვთ გამოცდილება ჟურნალისტური გამოძიების წარმართვაში, ასევე ხართ პატრიოტები. გთავაზობთ, ჟურნალისტურ გამოძიებას ამ საქმის შესახებ, სადაც საქართველოს მოსახლეობას და ასევე ჩვენს უცხოელ მეგობრებს,ნათლად ვაჩვენებთ, რა მოხდა, როგორ მოხდა და ვინ დგას ამის უკან, ვიცი თემა რთულია სარისკოა, მაგრამ საინტერესოცაა დამერწმუნეთ“ – წერს სოსო გოგაშვილი.
შეგახსენებთ, რომ საქართველოს პროკურატურამ თემირლან მაჩალიკაშვილის გარდაცვალების საქმეზე მიმდინარე გამოძიება შეწყვიტა. ამის შესახებ განცხადება თბილისის პროკურატურაში გაკეთდა.
„ჩატარებული გამოძიებით დადგინდა, რომ თემირლან მაჩალიკაშვილი არ დაემორჩილა სპეცრაზმელის მოთხოვნას ხელები ეჩვენებინა მისთის და სცადა ხელყუმბარის საბრძოლო მოქმედებაში მოყვანა, რის გამოც სპეცრაზმელმა მისი მიმართულებით განახორციელა გასროლა“, – განაცხადეს პროკურატურაში.
საგამოძიებო ორგანოს ცნობით, ხელყუმბარიდან ამოღებული ნიმუშები ემთხვევა თემირლან მაჩალიკაშვილის გენეტიკურ პროფილს.
საქმეზე სულ 124 პირი დაიკითხა, მათ შორის სპეცოპერაციაში მონაწილე 32 სპეცრაზმელი, ოჯახის წევრები, მეზობლები და სხვ.
პროკურატურაში ასევე აღნიშნეს, რომ სუსის უფროსის მაშინდელი მოადგილე სოსო გოგაშვილი, რომელსაც ოჯახი ბრალდებებს უყენებს, სპეცოპერაციის მომენტში ადგილზე საერთოდ არ იმყოფებოდა.
