ჰომომონუმენტი არის ამსტერდამის ისტორიულ ცენტრში გახსნილი მემორიალი, რომელიც აღმართულია ყველა გეი და ლესბოსელის ხსოვნისთვის, რომლებსაც სექსუალური ორიენტაციის გამო ჩაგრავდნენ და დევნიდნენ. ძეგლი შეიქმნა იმისთვის, რომ ხელი შეუწყონ და ჰომოსექსუალების დისკრიმინაციისა და რეპრესიების წინააღმდეგ ბრძოლას.
ჰოლანდიელი მხატვრის, კარინ დაანის მიერ შექმნილი ძეგლი გაიხსნა 1987 წლის 5 სექტემბერს, ვესტერმარკში. ეს არის ვარდისფერი გრანიტის სამი სამკუთხედის აბსტრაქტული კომპოზიცია. ამ სიმბოლიზმს ისტორიული ფონი აქვს – ვარდისფერი სამკუთხედი ნაცისტების საკონცენტრაციო ბანაკებში ჰომოსექსუალი პატიმრების ნიშანს წარმოადგენდა. უფრო მეტიც, სხვა კატეგორიის პატიმართა მსგავსი ნიშნებისგან განსხვავებით, იგი ზომით უფრო დიდი იყო, ვიდრე სხვები – ისე, რომ ყველას შორიდან დაენახა, რომ ერთ-ერთი ყველაზე საზიზღარი ჯგუფის წევრია.
საკონცენტრაციო ბანაკებში ჰომოსექსუალთა სიკვდილიანობამ 60% -ს გადააჭარბა; სხვადასხვა შეფასებით, იმ პერიოდში 50 ათასამდე გეი დაიღუპა. ამის შემდეგ, ვარდისფერი სამკუთხედი გახდა ლგბტ საზოგადოების ემანსიპაციისა და მისი უფლებებისთვის ბრძოლის სიმბოლო.
