“ვისაც ამ ქვეყანაში უსინდისობა მობეზრდა და ყელში ამოუვიდა, ვისაც ამ ქვეყანაში შლეგი ოლიგარქის მმართველობა ყელში ამოუვიდა, ის მოვა რეფერენდუმზე და ხმას მისცემს “ქართული ოცნების” რეჟიმის წინააღმდეგ. მინდა ფოთელებს მივმართო, მეგობრებო, ერთი კვირა სულ წვიმდა და პროგნოზით, კიდევ ორი კვირა წვიმა იქნება. დღევანდელი დღე არის გამონაკლისი, მემგონი ბუნება გვკარნახობს, რომ ცვლილებების დრო მოვიდა, არ დაიზაროთ და მოდით”, – ამის შესახებ ფოთში ოპოზიციის შეთანხმებულმა მერობის კანდიდატმა გიგი უგულავამ ჟურნალისტებს ხმის მიცემის შემდეგ განუცხადა.
მისი შეფასებით, ფოთში არჩევნები დარღვევების ფონზე მიმდინარეობს. უგულავამ საკუთარი არჩევანი # 15 უბანზე დააფიქსირა.
“კონკრეტული რამ მინდა გითხრათ, ახლა ოქტომბერია და თითოეულ თქვენგანს აქვს მოლოდინი, დაიწყება თევზის სუნი, ძალიან კარგად იცით ვინ ააყროლებს ამ ქალაქს. ეს არის ოლიგარქის საცეცები აქ, ადგილზე და ამის მიხედვით გააკეთეთ არჩევანი. თუ ეს რეჟიმი დარჩება, ხვალიდან ისევ თევზის სუნით ააყროლებენ ქალაქს. მოგექცევიან ზუსტად ისე, როგორც აქამდე გექცეოდნენ. ამიტომ მოდით, იაქტიურეთ და შევცვალოთ სიტუაცია ფოთში და მთელ ქალაქში.
რაც შეეხება დარღვევებს, თავფუჩეჩა კაცს მინდა მივმართო, მმართველი პარტიის თავმჯდომარე რომ ჰქვია, მან მიიღო კანონი, რომლის მიხედვითაც 100 მეტრის რადიუსი უნდა იყოს დაცული. შეგვიძლია გავიაროთ 32-ვე საარჩევნო უბანში და ნახავთ, რომ მისი წარმომადგენლები ამ კანონს არღვევენ. მეორე, მან მიიღო კანონი, რომ მოქალაქეების თავისუფალი ნების კონტროლი არ შეიძლება. ახლა ვსვამ კითხვას, საიდან აქვს “ქართული ოცნების” კოორდინატორებს სურათებიანი სია. სურათებიანი სია აქვს მხოლოდ ცესკო-ს. ამიტომ, თუ კანონს მიიღებ, ის კანონი უნდა დაიცვა, თქვენ არაფერი არ გიშველით, ყველა “მარშუტკები”, რომ ჩამოალაგეთ, თბილისი – ფოთის ხაზზე რაც მოძრაობს, სენაკის და აჭარის მიმართულების გზაზე, მაინც არაფერი გიშველით, თქვენი დრო წასულია. ასე რომ სიტუაციას ნუ დაიმძიმებთ, დაანებეთ ხალხის კონტროლს თავი,“- განაცხადა გიგი უგულავამ.
დღეს, 2 ოქტომბრს საქართველოში ადგილობრივი თვითმართველობის არჩევნებია. ამომრჩევლები ქვეყნის მასშტაბით 64 მერს და ასევე, 64 საკრებულოს 2 068 წევრს აირჩევენ, როგორც პროპორციული, ისე მაჟორიტარული წესით.
მერის არჩევნებში გამარჯვებულად გამოცხადდება კანდიდატი, რომელიც არჩევნებში ამომრჩეველთა ხმების 50%-ზე მეტს მიიღებს. თუ კონკრეტულ მუნიციპალიტეტში ვერცერთმა კანდიდატმა ეს ნიშნული ვერ გადალახა, არჩევნების მეორე ტური დაინიშნება.
ნახეთ „პრაიმტაიმის“ სხვა სიახლეები
