სახელმწიფო რწმუნებულმა კახეთის მხარეში, რეგიონში არსებული ოთხივე ცხელების ცენტრი მოინახულა.
ირაკლი ქადაგიშვილი საავადმყოფოებში არსებული ვითარებითა და ახალი კორონავირუსის სავარაუდო სიმპტომებით დაავადებული პაციენტების მისაღებად მზადყოფნის რეჟიმით დაინტერესდა.
„ყველგან დამაკმაყოფილებელი მდგომარეობაა. პერსონალს ყველგან აქვს მკურნალობისთვის საჭირო გაიდლაინები და აღჭურვილობა. ვფიქრობთ, რომ ცხელების ცენტრები თავის მოვალეობას პირნათლად შეასრულებენ. ვიმედოვნებთ, რომ მათი გამოყენების დიდი საჭიროება არ დადგება,“ – განაცხადა ქადაგიშვილმა.
შეგახსენებთ, კახეთის რეგიონში ახალი კორონავირუსის საეჭვო სიმპტომებიანი პაციენტების მისაღებად ოთხი – თელავის ორი, ლაგოდეხის და საგარეჯოს საავადმყოფოებია მომზადებული.
- დღეს საქართველოში კორონავირუსით მეორე ადამიანი გარდაიცვალა.
- ბოლო მონაცემებით, ქვეყანაში კორონავირუსის 170 შემთხვევაა დაფიქსირებული.
- 28 მარტს გამკაცრდა საკარანტინო რეჟიმი სამეგრელოსა და ზემო სვანეთში.
- 23 მარტს, მთავრობის უწყებათშორისი საკოორდინაციო საბჭოს გადაწყვეტილებით, მარნეული და ბოლნისი მთლიანად ჩაიკეტა
- 21 მარტს, პრეზიდენტმა საქართველოს მთელს ტერიტორიაზე საგანგებო მდგომარეობა გამოაცხადა.
- საქართველოს ყველა მოქალაქე, რომელიც ქვეყანაში შემოვა, საკარანტინო ზონაში მოთავსდება.
- მთავრობის გადაწყვეტილებით, საქართველოში სასურსათო მაღაზიების, ბენზინგასამართი სადგურების, კვების ობიექტების, ღია საკოლმეურნეო ბაზრების და აფთიაქების გარდა ყველა სავაჭრო ობიექტი დაიხურა.
- შექმნილი მდგომარეობიდან გამომდინარე, სამარშრუტო ტაქსების მოძრაობა აიკრძალა.
- შეზღუდვები შეეხო კაფე-ბარებსა და რესტორნებს.
ავტორი: ხათუნა გულიაშვილი
