ბრაზილიის ჩრდილოეთ ნაწილში, ამაზონასის შტატის ქალაქ მანაუსში მასობრივ სამარხს ამზადებენ. ინფორმაციას ამის შესახებ CNN-ი ავრცელებს.
როგორც ქალაქის მერი, ვირჯილიო ნეტო აცხადებს, კორონავირუსის გამო მანაუსში სიკვდილიანობის მაჩვენებელი გასამმაგდა და ყოველდღიურად 100-ზე მეტი ადამიანის დაკრძალვა უწევთ.
„იმის მიუხედავად, რომ ჩვენ კრიტიკულ მდგომარეობაში ვცხოვრობთ, სავარაუდოდ, მთელი ქვეყნის მასშტაბით ყველაზე სერიოზულ ვითარებაში, ჩვენ არ მიგვიღია დახმარება ფედერალური მთავრობისგან“, – აცხადებს ქალაქის მერი.
ცნობისათვის, ბოლო მონაცემებით, ბრაზილიაში კორონავირუსის 43 000-ზე მეტი დადასტურებული შემთხვევაა. ვირუსს 2 741 ადამიანის სიცოცხლე ემსხვერპლა.
