ინფექციური საავადმყოფოს დირექტორის განცხადებით, გორში, კორონავირუსით გარდაცვლილი 45 წლის ქალის სიკვილის მიზეზი ინსულტი გახდა.
ამის შესახებ თენგიზ ცერცვაძემ „პირველი არხის“ ეთერში განაცხადა.
„რამდენიმე დღის წინ გორის ჰოსპიტალში გარდაიცვალა ქალბატონი, რომელიც ერთადერთი ახალგაზრდა გარდაცვლილია ჩვენს ქვეყანაში.
იმის ფონზე, რომ აშშ-ში 20%-ია 20 წლიდან 64 წლამდე, საქართველოში ეს იყო სამწუხარო, მაგრამ ერთადერთი შემთხვევა, როდესაც 68 წელზე ნაკლები ასაკის ადამიანი გარდაიცვალა.
ამ ქალბატონს არ ჰქონდა კოვიდ-ინფექცია. ვირუსზე პასუხი იყო უარყოფითი, მაგრამ მას ჰქონდა ძალიან დიდი მოცულობის ჰემორანგიული ინსულტი და ის გარდაიცვალა ინსულტით“, – განაცხადა ცერცვაძემ.
შეგახსენებთ, რომ გორის სამხედრო ჰოსპიტალში 45 წლის ქალბატონი 8 მაისს გარდაიცვალა.
მსგავსი განცხადება ინფექციური საავადმყოფოს დირექტორმა ბათუმში გარდაცვლილ მე-11 პაციენტზეც გააკეთა. ცერცვაძის თქმით 81 წლის მამაკაცის გარდაცვალების მიზეზი, კორონავირუსით მიღებული მძიმე დაზიანებები გახდა.
დღეს COVID-19-ით საქართველოში მე-11 პაციენტი გარდაიცვალა. 81 წლის მამაკაცი ბათუმის კლინიკაში მკურნალობდა.
ამ დროის მონაცემებით, ჩვენს ქვეყანაში კორონავირუსით ინფიცირების 638 შემთხვევაა დაფიქსირებული, აქედან 317 პაციენტი გამოჯანმრთელდა.
