„ყველა ის პროგრამა, რომელსაც სახელმწიფო ბიზნესის, მცირე მეწარმეობის, ადგილობრივი წარმოების მხარდასაჭერად ახორციელებს, იუსტიციის სამინისტროს ადგილობრივ სივრცეში იქნება განთავსებული“,- ამის შესახებ პრემიერ-მინისტრმა, გიორგი გახარიამ მთავრობის სხდომაზე განაცხადა.
მისი თქმით, ამ გზით მეწარმეებს თბილისში ჩამოსვლა აღარ მოუწევთ და სერვისს ადგილზე მიიღებენ.
„აწარმოე საქართველოში“, ისევე როგორც სოფლის მეურნეობის პროგრამები, უახლოეს ერთ თვეში საზოგადოებრივი ცენტრებისა და იუსტიციის სახლების საშუალებითა და არხებით პირდაპირ მივა ჩვენს თითოეულ მოქალაქესთან.
ეს ნიშნავს იმას, რომ ყველა ის პროგრამა, რომელსაც სახელმწიფო ახორციელებს ბიზნესის, მცირე მეწარმეობის, ადგილობრივი წარმოების მხარდასაჭერად, იუსტიციის სამინისტროს ადგილობრივ სივრცეში იქნება განთავსებული და იმის მაგივრად, რომ ჩვენს მოქალაქეებს, ფერმერებს, მეწარმეებს აუცილებლობა ჰქონოდა ჩამოსულიყვნენ თბილისში და აქ, ეკონომიკისა და სოფლის მეურნეობის სამინისტროში ერკვიათ ამა თუ იმ პროგრამის დეტალები, ახლა ეს პროგრამები იქნება თითოეული მათგანის ადგილობრივ დონეზე, რაიონში“,- განაცხადა გიორგი გახარიამ.
