„გირჩის“ ლიდერი ზურა ჯაფარიძე მიიჩნევს, რომ სალომე ზურაბიშვილმა გიგი უგულავასა და ირაკლი ოქრუაშვილის შესახებ გადაწყვეტილება ერთპიროვნულად არ მიიღო.

ამის შესახებ ჯაფარიძემ აჭარის ტელევიზიაზე, ვახო ხუზმიაშვილის გადაცემა თავისუფალ სივრცეში განაცხადა.

მისივე თქმით, ზურაბიშვილს არ აქვს ისეთი პოლიტიკური კაპიტალი, რომ მსგავსი გადაწყვეტილებები ერთპიროვნულად მიიღოს.

„სალომე ზურაბიშვილს არ გააჩნია არანაირი პოლიტიკური კაპიტალი. რაც ჰქონდა ისიც გაანიავა. ხელისუფლებაში ეს ადამიანი არის „ქართული ოცნების“ მიერ მოყვანილი. როდესაც საპრეზიდენტო არჩევნები იყო, ისე გაუჭირდა ზურაბიშვილს, რომ მისი სურათები ჩამოხსნეს ბილბორდებიდან და საკუთარი ფოტოები გამოაკრეს, მათ შორის ბიძინა ივანიშვილის. მას არ აქვს არანაირი პოლიტიკური წონა და ის თავიდან ბოლომდე არის ივანიშვილის მიერ დასმული ადამიანი. რა სურათებიც არ უნდა დადგან და რაც არ უნდა ხატონ, რომ თითქოს ის არის დამოუკიდებელი მოთამაშე, დგას პარტიულ პოლიტიკაზე მაღლა და ზეპარტიული ქვეყნის ლიდერია, ეს ყველაფერი მაინც არის თამაში, როგორც ჩემი გადმოსახედიდან, ისე ჩვენი დასავლელი პარტნიორების გადმოსახედიდანაც“, – ამბობს ზურა ჯაფარიძე.