AstraZeneca-ს განცხადებით, მათი ვაქცინა ღორის ხორცისგან მიღებულ ინგრედიენტებს არ შეიცავს და ისლამურ კანონებს შეესაბამება.
ინფორმაციას ამის შესახებ Reuters-ი ავრცელებს.
ფარმაცევტულმა კომპანიამ ეს განცხადება მას შემდეგ გააკეთა, რაც ინდონეზიის მუსლიმთა უმაღლესმა სასულიერო საბჭომ, ინდონეზიის ულემას საბჭომ განაცხადა, რომ AstraZeneca ვაქცინის დასამზადებლად ტრიპსინს იყენებს,რომელიც ღორის პანკრეასისგან მიიღება.
ცნობისთვის, ინდონეზიამ AstraZeneca-ს ვაქცინის გამოყენება მას შემდეგ დაამტკიცა, რაც ევროპის წამლის სააგენტომ განაცხადა რომ ვაქცინა „უსაფრთხო და ეფექტურია“.
პანდემიის დაწყებიდან დღემდე ინდონეზიაში კორონავირუსის 1,455,788 შემთხვევა დაფიქსირდა.
