ბანკებისთვის უკვე მიწოდებულია ახალი ბანკნოტები, რომლებიც მიმოქცევაში პირველად გადის – ამის შესახებ ინფორმაცია „ეროვნული ბანკის“ Facebook-გვერდზე გავრცელდა.
ეროვნულ ბანკში აცხადებენ, რომ საკასო ცენტრში შემოსული ფული კარანტინში თავსდება და მხოლოდ ამის შემდეგ ხდება მისი გახსნა და გადათვლა.
ასევე, ბანკებისთვის მიწოდებულ ბანკნოტებს ჯანდაცვის უწყებების რეკომენდაციის დაცვით, სადეზინფექციო სამუშაოები უტარდება.
„იმისათვის, რომ ქვეყნისათვის ამ ურთულეს პერიოდში საფინანსო სექტორი გამართულად ფუნქციონირებდეს, კრიტიკული სისტემები შეუფერხებლად მუშაობდეს და ეკონომიკა ფულის ნიშნებით უწყვეტად მარაგდებოდეს, ეროვნული ბანკის თანამშრომლებს, ისევე როგორც სხვა არაერთი პროფესიის წარმომადგენელს, არაორდინარულ პირობებში უწევთ საკუთარი მოვალეობების შესრულება.
მუდმივი კონსულტაციები გვაქვს ევროპის ქვეყნების ცენტრალურ ბანკებთან, ვიზიარებთ მათ გამოცდილებას და ვმოქმედებთ შესაბამისად.
როგორც ცნობილია, საკასო ცენტრში შემოსული ფული კარანტინში თავსდება და მხოლოდ ამის შემდეგ ხდება მისი გახსნა და გადათვლა.
აქვე აღვნიშნავთ, რომ ბანკებისთვის უკვე მიწოდებულია ახალი ბანკნოტები, რომლებიც მიმოქცევაში პირველად გადის. ასევე, ჯანდაცვის უწყებების რეკომენდაციის დაცვით, ტარდება სადეზინფექციო სამუშაოები.
კვლევები ადასტურებს, რომ კუპიურა ინფექციის ისეთივე წყარო შეიძლება იყოს, როგორც ნებისმიერი სხვა ნივთი: პოლიეთილენის პარკი, კარის სახელური, ბანკომატის კლავიატურა, საყიდლების ურიკა მაღაზიაში და ა.შ.
ვიყოთ ფრთხილად, დავიცვათ პროფესიონალთა რეკომენდაციები, მაქსიმალურად გამოვიყენოთ გადახდის უკონტაქტო და დისტანციური საშუალებები და რაც ყველაზე მნიშვნელოვანია, ყველა ზემოაღნიშნულ შემთხვევაში – ხშირად დავიბანოთ ხელები!“ – ნათქვამია განცხადებაში.
