ბოჭორიშვილის კლინიკის ბოქსირებულ განყოფილებაში 41 პაციენტი მკურნალობს. აქედან, 3 პაციენტს დაუდასტურდა Covid-19, – ამის შესახებ ბოჭორიშვილის კლინიკის წარმომადგენელი, მაკა სოლოღაშვილი აცხადებს.
„დადასტურებული დიაგნოზით სულ 13 პაციენტია და ყველას კლასტერი ცნობილია. სამივე შემთხვევა შიდა გავრცელებას უკავშირდება“, – ამბობს სოლოღაშვილი.
ცნობისთვის, ბოჭორიშვილის კლინიკაში მოთავსებული სამი ახალი ინფიცირებული ოჯახის წევრებისგან დაინფიცირდნენ.
ბოლო მონაცემებით, საქართველოში კორონავირუსით ინფიცირების შემთხვევათა რაოდენობა 195- მდე გაიზარდა.
კარანტინის რეჟიმშია 4735 ადამიანი, ხოლო სტაციონარში მეთვალყურეობის ქვეშ – 383 პირი.
ცნობისთვის, საქართველოში 31 მარტიდან კარანტინის რეჟიმი ამოქმედდა.
- 28 მარტს გამკაცრდა საკარანტინო რეჟიმი სამეგრელოსა და ზემო სვანეთში.
- 23 მარტს, მთავრობის უწყებათშორისი საკოორდინაციო საბჭოს გადაწყვეტილებით, მარნეული და ბოლნისი მთლიანად ჩაიკეტა
- 21 მარტს, პრეზიდენტმა საქართველოს მთელს ტერიტორიაზე საგანგებო მდგომარეობა გამოაცხადა.
- საქართველოს ყველა მოქალაქე, რომელიც ქვეყანაში შემოვა, საკარანტინო ზონაში მოთავსდება.
- მთავრობის გადაწყვეტილებით, საქართველოში სასურსათო მაღაზიების, ბენზინგასამართი სადგურების, კვების ობიექტების, ღია საკოლმეურნეო ბაზრების და აფთიაქების გარდა ყველა სავაჭრო ობიექტი დაიხურა.
- შექმნილი მდგომარეობიდან გამომდინარე, სამარშრუტო ტაქსების მოძრაობა აიკრძალა.
- შეზღუდვები შეეხო კაფე-ბარებსა და რესტორნებს.
