დღეს მეათე მოწვევის პარლამენტის სხდომა გაიმართება. პარლამენტის პირველ სხდომას სალომე ზურაბიშვილი გახსნის.
რეგლამენტის გათვალისწინებით, პრეზიდენტის მიერ პარლამენტის პირველი სხდომის გახსნის შემდეგ, სხდომას სპიკერის არჩევამდე, პარლამენტის უხუცესი წევრი უძღვება.
31 ოქტომბრის არჩევნების შედეგებით, პარლამენტის უხუცესი წევრი, „ნაციონალური მოძრაობის“ სიის პირველი ნომერი, 82 წლის ბუბა კიკაბიძე უნდა ყოფილიყო, თუმცა გამომდინარე იქიდან, რომ ოპოზიცია ბოიკოტის რეჟიმშია, პარლამენტს თავმჯდომარის არჩევამდე „ქართული ოცნების“ უხუცესი წევრი, ლადო კახაძე გაუძღვება.
ლადო კახაძე 67 წლისაა. იგი პროფესიით ექიმია. ის 1998-2002 წლებში თბილისის საკრებულოს თავმჯდომარე იყო, 2019 წლიდან კი საქართველოს მეცხრე მოწვევის პარლამეტნის დეპუტატი გახდა.
კახაძემ მაშინ პარლამენტში სალომე ზურაბიშვილის ადგილი დაიკავა, რომელმაც 2018 წელს პრეზიდენტის არჩევნებში გაიმარჯვა.
