ირანში დააკავეს სამი მამაკაცი, რომლებიც სოციალური ქსელის Instagram-ის გამოყენებით, ბავშვების გაყიდვას ცდილობდნენ. ინფორმაციას BBC-ი ავრცელებს.
როგორც თეირანის პოლიციის უფროსი, ჰოსეინ რაჰიმი აცხადებს, მათი დაკავება სწორედ მაშინ მოხდა, როდესაც ისინი 2 ბავშვის გაყიდვას ცდილობდნენ.
ერთი ბავშვი 20 დღის, მეორე კი 2 თვის იყო.
პოლიციის ცნობით, ორმა მამაკაცმა წარსულში ბავშვები ერთხელ უკვე გაყიდეს 500 დოლარად, ახლა კი ახალშობილების გაყიდვას 2 000-2 500 ლარის ფარგლებში ცდილობდნენ.
ერთ-ერთი დაკავებულის თქმით, გარკვეული თანხის გადახდის შემდეგ, მას ბავშვები ღარიბი ოჯახებიდან მოჰყავდა და ცდილობდა ისეთი ოჯახებისთვის გადაეცა, რომლებიც ბავშვისთვის უკეთესი მომავლის შექმნას შეძლებდნენ:
„ეს ბავშვებს დაეხმარებოდათ, უკეთესი მომავალი ჰქონოდათ“.
ეს ირანში ბავშვების გაყიდვის პირველი შემთხვევა არ არის.
ამ წელს პოლიციამ 4 ქალი და ერთი მამაკაცი დააკავა, რომლებიც ღარიბ ორსულ ქალებს ეძებდნენ, მათ საავადმყოფოს ხარჯებს იხდიდნენ და შემდეგ ბავშვებს ართმევდნენ.
თეირანის პოლიციამ სოციალურ სივრცეში ბავშვთა ტრეფიკინგის დახმარებისთვის ათი ვებ-გვერდი აღმოაჩინა.
