კითხვაზე, შესაძლოა, თუ არა კორონავირუსი საქართველოში ჯერ კიდევ დეკემბერში ყოფილიყო, დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელი ხათუნა ზახაშვილი ამბობს, რომ დეკემბერ-იანვარში უკვე ტესტირებული ნიმუშები დაიტესტა SARS-CoV2-ის ვირუსზე და არც ერთ მათგანში კორონავირუსი არ დაფიქსირებულა.
„დეკემბერ-იანვარში ტესტირებული ნიმუშები ჩვენთან ხელმეორედ გადაიტესტა მათ შორის SARS-CoV2-ის ვირუსზე.
დეკემბრიდან მოყოლებული ყველა ნიმუში, რომელიც ტესტირებული იყო გრიპზე, ასევე შემდგომში დაიტესტა SARS-CoV2 ვირუსზე და არც ერთ მათგანში, ვიდრე 23 თებერვლამდე, ვიდრე პირველი შემთხვევა დავარაგისტრირეთ საქართველოში, კორონავირუსი არ დაგვიჭერია, არ გამოვლენილა და ეს არის ერთ-ერთი მტკიცებულება იმისა, რომ მანამდე ჩვენს ქვეყანაში SARS-CoV2 არ დაფიქსირებულა“, – განაცხადა ხათუნა ზახაშვილმა.
ამავე კითხვაზე პასუხისას, დაავადებათა კონტროლის ხელმძღვანელმა ამირან გამყრელიძემ დასძინა:
„თუმცა ეშმაკს არ სძინავს, დღესაც გავრცელდა ინფორმაცია საფრანგეთზე თითქოს დაადასტურეს, რომ მანამდე იყო საფრანგეთში“
ბოლო მონაცემებით:
საქართველოში კორონავირუსით ინფიცირებულთა რაოდენობა 604-მდე გაიზარდა.
მათგან, გამოჯანმრთეელდა 240 პაციენტი.
საქართველოში კორონავირუსით 9 ადამიანი გარდაიცვალა.
კარანტინის რეჟიმში – 5260
სტაციონარში მეთვალყურეობის ქვეშ – 553
უცხოეთიდან სამკურნალოდ გადმოყვანილი საქართველოს მოქალაქეები – 3.
