ინფექციური საავადმყოფოდან მე-13 გამოჯანმრთელებული პაციენტი გაწერეს. ამის შესახებ ინფექციურის საავადმყოფოს სამედიცინო დირექტორმა მარინა ეზუგბაიამ განაცხადა.
მისი თქმით, პაციენტი 2 კვირის განმავლობაში, სახლში თვითიზოლაციაში დარჩება.
„დილის მერე სიტუაცია არ შეცვლილა, რაც იმას ნიშნავს, რომ ამ ეტაპზე საქართველოში გვყავს 81 და საღამოს მონაცემებიც იგივეა, არაფერი არ შეცვილა. 81 დადასტურებული შემთხვევიდან ჩვენთან [ინფექციურ საავადმყოფოში] მკურნალობს 32 პაციენტი. ცამეტმა პაციენტმა უკვე დატოვა ჩვენი კლინიკა“, – განაცხადა მარინა ეზუგბაიამ.
საქართველოში კორონავირუსით ინფიცირებული პირველი პაციენტი, ინფექციური კლინიკიდან, 16 მარტს გაწერეს.
მიმდინარე მოვლენების ინფორმაცია მოკლედ:
- 27 მარტის მონაცემებით, საქართველოში კორონავირუსის შემთხვევა 81-მდე გაიზარდა.
- 23 მარტს, მთავრობის უწყებათშორისი საკოორდინაციო საბჭოს გადაწყვეტილებით, მარნეული და ბოლნისი მთლიანად ჩაიკეტა
- 21 მარტს, პრეზიდენტმა საქართველოს მთელ ტერიტორიაზე საგანგებო მდგომარეობა გამოაცხადა.
- მთავრობის გადაწყვეტილებით, საქართველოში სასურსათო მაღაზიების, ბენზინგასამართი სადგურების, კვების ობიექტების, ღია საკოლმეურნეო ბაზრების და აფთიაქების გარდა ყველა სავაჭრო ობიექტი დაიხურა.
- შექმნილი მდგომარეობიდან გამომდინარე, სამარშრუტო ტაქსების მოძრაობა აიკრძალა.
- შეზღუდვები შეეხო კაფე-ბარებსა და რესტორნებს.
- საქართველოს ყველა მოქალაქე, რომელიც ქვეყანაში შემოვა, საკარანტინო ზონაში მოთავსდება.
- ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის.
- პრემიერ-მინისტრმა სახელმწიფო და კერძო დაწესებულებისთვის დისტანციურ რეჟიმში მუშაობის რეკომენდაცია გასცა.
წაიკითხეთ და გაითვალისწინეთ საჭირო რეკომენდაციები
გადაწყვეტილება, რომელიც საგანგებო რეჟიმს დროს მოქმედებს
