კორონავირუსით ინფიცირებული 10 წლის ბავშვი, რომელიც ამ წუთებში ოჯახის მოთხოვნით აჭარიდან თბილისში გადმოჰყავთ, საფრანგეთში მოგზაურობის ისტორია აქვს.

აჭარის ჯანდაცვის მინისტრის ზაალ მიქელაძის თქმით, მცირეწლოვანმა საკარანტინო სივრცეში 11 დღე გაატარა.

„​მცირეწლოვანს დაუდგინდა კორონავირუსი. მიუხედავად იმისა, რომ გვაქვს ბათუმში მკურნალობის საშუალება, ოჯახის მოთხოვნით ინფიცირებული თბილისში გადაჰყავთ.

რაც შეეხება ბავშვის ბებიას, მას ცხელება არ ჰქონია და შესაბამისად ინფექციაზე არ გამოუკვლევიათ. მას საჭიროების მიხედვით თბილისში გამოიკვლევენ.“ – განაცხადა ზაალ მიქელაძემ.

აჭარის ჯანდაცვის მინისტრის ინფორმაციით, ამჟამად ბათუმის კლინიკაში 8 ინფიცირებული პაციენტი რჩება.

ცნობისთვის, 1-ლი აპრილის მდგომარეობით საქართველოში 117 ინფიცირებულია. გამოჯანმრთელდა 23 პაციენტი.

• 31 მარტიდან კარანტინის რეჟიმი ამოქმედდა

• გამოცხადდა კომენდანტის საათი

• 28 მარტს გამკაცრდა საკარანტინო რეჟიმი სამეგრელოსა და ზემო სვანეთში.

• 23 მარტს, მთავრობის უწყებათშორისი საკოორდინაციო საბჭოს გადაწყვეტილებით, მარნეული და ბოლნისი მთლიანად ჩაიკეტა

• 21 მარტს, პრეზიდენტმა საქართველოს მთელს ტერიტორიაზე საგანგებო მდგომარეობა გამოაცხადა.

• საქართველოს ყველა მოქალაქე, რომელიც ქვეყანაში შემოვა, საკარანტინო ზონაში მოთავსდება.

• მთავრობის გადაწყვეტილებით, საქართველოში სასურსათო მაღაზიების, ბენზინგასამართი სადგურების, კვების ობიექტების, ღია საკოლმეურნეო ბაზრების და აფთიაქების გარდა ყველა სავაჭრო ობიექტი დაიხურა.

• შექმნილი მდგომარეობიდან გამომდინარე, სამარშრუტო ტაქსების მოძრაობა აიკრძალა.

• შეზღუდვები შეეხო კაფე-ბარებსა და რესტორნებს.

• ნახეთ, რას ნიშნავს საყოველთაო კარანტინი და რა წესები მოქმედებს მისი გამოცხადებისას.