კორონავირუსით ინფიცირებულთა რაოდენობა ორით გაზარდა. ამის შესახებ თბილისის ინფექციური საავადმყოფოს სამედიცინო დირექტორმა, მარინა ეზუგბაიამ განაცხადა.

„დღეს, დაგვემატა კორონავირუსის დადასტურებული ორი შემთხვევა. ერთ პაციენტს სომხეთში მოგზაურობის ისტორია აქვს. მეორე პაციენტი გადმოჰყავთ ბათუმიდან. ეს გახლავთ 10 წლის ბავშვი მშობელთან ერთად. მის მშობელს უარყოფითი პასუხი მოუვიდა. ჩემთვის უცნობია მისი დაინფიცირების ისტორია. “ – აცხადებს მარინა ეზუგბაია.

ინფექციური საავადმყოფოს სამედიცინო დირექტორის თქმით,  ორი მძიმე პაციენტის ჯანმრთელობის მდგომარეობა არ შეცვლილა და ისევ არასტაბილურია.

„დღის მეორე ნახევარში კიდევ ჩატარდება 12 პაციენტის ტესტირება. “ – განაცხადა მარინა ეზუგბაიამ.

ცნობისთვის, 1-ლი აპრილის მდგომარეობით საქართველოში 117 ინფიცირებულია.  გამოჯანმრთელდა 23 პაციენტი.

• 31 მარტიდან კარანტინის რეჟიმი ამოქმედდა

• გამოცხადდა კომენდანტის საათი

• 28 მარტს გამკაცრდა საკარანტინო რეჟიმი სამეგრელოსა და ზემო სვანეთში.

• 23 მარტს, მთავრობის უწყებათშორისი საკოორდინაციო საბჭოს გადაწყვეტილებით, მარნეული და ბოლნისი მთლიანად ჩაიკეტა

• 21 მარტს, პრეზიდენტმა საქართველოს მთელს ტერიტორიაზე საგანგებო მდგომარეობა გამოაცხადა.

• საქართველოს ყველა მოქალაქე, რომელიც ქვეყანაში შემოვა, საკარანტინო ზონაში მოთავსდება.

• მთავრობის გადაწყვეტილებით, საქართველოში სასურსათო მაღაზიების, ბენზინგასამართი სადგურების, კვების ობიექტების, ღია საკოლმეურნეო ბაზრების და აფთიაქების გარდა ყველა სავაჭრო ობიექტი დაიხურა.

• შექმნილი მდგომარეობიდან გამომდინარე, სამარშრუტო ტაქსების მოძრაობა აიკრძალა.

• შეზღუდვები შეეხო კაფე-ბარებსა და რესტორნებს.

• ნახეთ, რას ნიშნავს საყოველთაო კარანტინი და რა წესები მოქმედებს მისი გამოცხადებისას.