ინფექციური საავადმყოფოს სამედიცინო დირექტორის, მარინა ეზუგბაიას განმარტებით ახალი დადასტურებული შემთხვევიდან სამი იმპორტირებულია და ისინი საქართველოს მოქალაქეები არ არიან. ამის შესახებ მან ჟურნალისტებთან საუბრისას განაცხადა.
მისივე თქმით, ამ დროისთვის კოვიდ ცენტრებში 147 ადამიანი მკურნალობს.
„ახალი შემთხვევიდან ერთი არის დადასტურებულ საბურთალოს კლასტერთან კონტაქტი. დანარჩენი სამი არიან სატვირთო ავტომობილების მძღოლები. ესენი არიან იმპორტირებული, არა საქართველოს მოქალაქეები.
რაც შეეხება ჩვენს ცენტრს. ამ დროისთვის ჩვენთან 57 პაციენტი მკურნალობს.
მძიმე პნევმონიით და პრობლემური პაციენტები ამ ეტაპზე არ გვყავს. ძირთადად უკვე საშუალო სიმძიმის პაციენტები ჭარბობს“,- აღნიშნა ეზუგბაიამ.
კორონავირუსის შემთხვევა 800-მდე გაიზარდა. აქედან გამოჯანმრთელებულია 640 ადამიანი.
ამასთან, უცხოეთიდან სამკურნალოდ გადმოყვანილია საქართველოს სამი მოქალაქე. ახალი კორონავირუსის შედეგად, ქვეყანაში 13 პაციენტი გარდაიცვალა.
