ქუთაისში კატასტროფის ჯგუფმა აჭარიდან კოვიდინფიცირებული დედა-შვილი ქუთაისის ინფექციურში გადაიყვანა. კლინიკის სამედიცინო დირექტორის ნოდარ მაღლაფერიძის განცხადებით, პაციენტები აჭარის კლასტერიდან არიან. მათი მდგომარეობა, ამ ეტაპზე საშუალო სიმძიმისაა.
„კატასტროფის ჯგუფმა ორი პაციენტი, დედა-შვილი აჭარიდან გადმოიყვანა. მათ კორონავირუსი რამდენიმე საათის წინ დაუდასტურდათ. პაციენტების მდგომარეობა საშუალო სიმძიმისაა. მათ შესაბამისი გამოკვლევები უტარდებათ“, – განაცხადა კლინიკის სამედიცინო დირექტორმა ნოდარ მაღლაფერიძემ.
ქუთაისის ახალ ინფექციურ კლინიკაში 17 კოვიდ დადებითი პაციენტი მკურნალობს.
საქართველოში კორონავირუსის კიდევ 45 შემთხვევა გამოვლინდა. ამჟამად ინფიცირებულთა რაოდენობა 1729-ს შეადგენს, აქედან გამოჯანრმთელებულია 1321 ადამიანი. დღეს კიდევ 6 ადამიანი გამოჯანმრთელდა. ინფორმაცია უკვე განახლდა stopcov.ge-ზე.
ბოლო მონაცემებით, კარანტინის რეჟიმში იმყოფება 6020 ადამიანი, სტაციონალური მეთვალყურეობის ქვეშ 299, ხოლო გარდაცვლილია 19.
