ქალი, რომელიც ყველაზე მძიმე პაციენტად მოიხსენიეობდა, დღეს კლინიკიდან გაეწერება – ამის შესახებ ინფორმაციას საუნივერსიტეტო კლინიკის დირექტორმა ლევან რატიანმა ჟურნალისტებთან საუბრისას განაცხადა.
„გუშინ გავაკეთე განცხადება, რომ ჩვენს კლინიკაში იწვა ყველაზე მძიმე პაციენტი მთელი საქართველოს მასშტაბით, ეს იყო ქალბატონი. ის იყო დამძიმებული ანამნეზით და 97%-ით ეს შემთხვევა უნდა დასრულებულიყო ლეტალურად, მაგრამ ასე არ მოხდა და ეს არის კიდევ ერთი ქართული მედიცინის გამარჯვება და ქალბატონი გამოჯანმრთელებული დაუბრუნდება დღეს სახლს. ეს რა თქმა უნდა კლინიკის მედპერსონალის დამსახურებაა“ – აცხადებს ლევან რატიანი.
- 1 აპრილის მდგომარეობით საქართველოში გამოჯანმრთელდა 22 ადამიანი.
- 28 მარტს გამკაცრდა საკარანტინო რეჟიმი სამეგრელოსა და ზემო სვანეთში.
- 23 მარტს, მთავრობის უწყებათშორისი საკოორდინაციო საბჭოს გადაწყვეტილებით, მარნეული და ბოლნისი მთლიანად ჩაიკეტა
- 21 მარტს, პრეზიდენტმა საქართველოს მთელს ტერიტორიაზე საგანგებო მდგომარეობა გამოაცხადა.
- საქართველოს ყველა მოქალაქე, რომელიც ქვეყანაში შემოვა, საკარანტინო ზონაში მოთავსდება.
- მთავრობის გადაწყვეტილებით, საქართველოში სასურსათო მაღაზიების, ბენზინგასამართი სადგურების, კვების ობიექტების, ღია საკოლმეურნეო ბაზრების და აფთიაქების გარდა ყველა სავაჭრო ობიექტი დაიხურა.
- შექმნილი მდგომარეობიდან გამომდინარე, სამარშრუტო ტაქსების მოძრაობა აიკრძალა.
- შეზღუდვები შეეხო კაფე-ბარებსა და რესტორნებს.
