ბათუმი-სარფის ცენტრალურ ავტომაგისტრალზე საავტომობილო მიმოსვლა შეფერხებულია. მიზეზი კრიმინალური ავტორიტეტის მინდია ლავასოღლის მხარდამჭერთა აქციაა, რომლებმაც გონიოს ხიდიდან მაგისტრალზე ფეხით საპროტესტო მსვლელობა დაიწყეს.
ადგილზე იმყოფებიან სამართალდამცველები, რომლებიც ცდილობენ, მოძრაობა ორმხრივად არ შეწყდეს და აქვიის მონაწილეებმა მხოლოდ გზის ერთი მიმართულება დაიჭირონ.
აქვიის მონაწილეები მსვლელობას სარფამდე გეგმავენ.
თურქმა სამართალდამცველებმა ლავას ოღლი მიმდინარე წლის ოქტომბერში, ტრაბზონში დააკავეს. მას ბრალი ედება სისხლის სამართლის კოდექსის 223-ე პრიმა მუხლის 2 ნაწილით, რაც გულისხმობს კანონიერ ქურდობას. ქუთაისის სასამართლომ მას დაუსწრებლად მიუსაჯა თავისუფლების აღკვეთა 12 წლის ვადით.
ადვოკატის ინფორმაციით, დაპატიმრების ვადა ლავასოღლის თურქეთში 28 თებერვალს ამოიწურა და ის საქართველოში უნდა გადმოეყვანათ. მისივე განმარტებით, ლავას ოღლი 28 თებერვალს გაათავისუფლეს და სადეპორტო სივრცეში გადაიყვანეს, საიდანაც საქართველოს ხელისუფლებას უნდა წაეყვანა, თუმცა 29 თებერვალს ის ისევ დააპატიმრეს და ციხეში დააბრუნეს.
