სოხუმის რესპუბლიკური საავადმყოფოდან მსჯავრდებული გაიქცა.
ინტერნეტგამოცემა “აფსადგილ ინფო-ს” ინფორმაციით, გურგენ კირაკოსიანი ქირურგიულ განყოფილებაში იყო მოთავსებული, სადაც მკურნალობის კურსს გადიოდა.
ოკუპირებული აფხაზეთის დე ფაქტო რესპუბლიკის შს სამინიტროს პრესსამსახურის ინფორმაციით, კირაკოსიანმა დილის 6:00 საათზე ხელბორკილებისგან გათავისუფლება მოახერხა, ზეწრები ერთმანეთს გადააბა და მესამე სართულის ფანჯრიდან ჩასვლა და სამედიცინო დაწესებულების ტერიტორიის დატოვება შეძლო.
ფაქტზე აღძრულია სისხლის სამართლის საქმე.
უწყების ცნობით, მანამდე ნასამართლევი სოფელ იაშტუხას მცხოვრები, გურგენ კირაკოსიანის წინააღმდეგ სისხლის სამართლის საქმე იარაღის და საბრძოლო მასალის უკანონო შენახვის გამო აღიძრა.
ბრალდებული სასამართლო დარბაზში არ გამოცხადდა, მიმდინარე წლის 15 მარტს მასზე ძებნა გამოცხადდა, ხოლო 15 მაისს ის დააკავეს.
ავტორი: თეა შონია
