ხობის მუნიციპალიტეტის სოფელ ჭალადიდში, წუხელ კოლეგა პოლიციელის მიერ მოკლული, ასევე პოლიციელის, პაპუნა ლოლუას ოჯახის წევრებს და ახლობლებს მომხდარ ფაქტზე საუბარი უჭირთ. ლოლუების ოჯახის ახლობელი ყვება,რომ ბრალდებულ პოლიციელს პათოლოგიური სიმთვრალე ჰქონდა, იგი რამდენჯერმე იყო უწყებიდან დათხოვნილი, თუმცა რამდენიმე თვის წინ ისევ აღადგინეს სამსახურში.
„მისი პათოლოგიური სიმთვრალის შესახებ ყველამ ვიცოდით სოფელში, მისი ოჯახი სოფლიდან უკვე გახიზნულია, სავარაუდოდ, ფოთში”, – ამბობს ლოლუების ოჯახის ახლობელი.
გარდაცვლილის და ბრალდებულის ოჯახებს ნათესაური კავშირიც აქვთ. არსებული ინფორმაციით, მკვლელობას წინ ურთიერთშელაპარაკება უძღვოდა.
პოლიციელი, მისმა კოლეგამ დაახლოებით, 12 გასროლით მოკლა.
“ბრალდებულს დალევა უყვარდა, პაპუნა კი ურჩევდა, რომ არ დაელია, და ეს არ აპატია. ეს მოფიქრებული მკვლელობაა, განყოფილებიდან წავიდა და მერე უკან საღამოს დაბრუნდა. რაღაც ახალი იარაღიდან გასროლა მოახდინა, როგორც ვიცით, ნასვამი იყო, შეიძლება შეშინება უნდოდა, მაგრამ ვერ დაიმორჩილა ეტყობა იარაღი. ცხედარს 10-ზე მეტი ტყვია მოხვდა”, – აცხადებს მოკლული პოლიციელის ოჯახის ახლობელი.
ცხედარს ექსპერტიზა უკვე ჩაუტარდა. ბრალდებული დაკავებულია.
მომხდარ ფაქტზე გამოძიება სსკ-ის 108-ე მუხლით მიმდინარეობს, რაც განზრახ მკვლელობას გულისხმობს.
ავტორი: თეა შონია
ნახეთ სახვა სიახლეები და ვიდეოები:
