„ინფრასტრუქტურული სამუშაოების მწარმოებელ კომპანიებს, რომლებიც არ დაემორჩილებიან დადგენილ სტანდარტს და დაარღვევენ რეგულაციებს, კონტრაქტი შეუწყდებათ“,- ამის შესახებ სახელმწიფო რწმუნებულმა კახეთში, ირაკლი ქადაგიშვილმა განაცხადა.
რწმუნებულის ინფორმაციით, რეგიონში შექმნილ ოპერატიულ შტაბში, ახალი რეგულაციები სოფლის მეურნეობის სამუშაოების მწარმოებელ კომპანიებსაც დაუწესეს.
„კახეთში ახლა მიმდინარეობს ხვნა-თესვის სამუშაოები. ბუნებრივია, ამ პროცესს ვერ შევაჩერებთ, მაგრამ რეგიონულ ოპერატიულ შტაბში, დავამტკიცეთ ახალი რეგულაცია და ის კომპანია, რომელიც იყენებს დაქირავებული მუშების შრომას, ვალდებული იქნება ერთ ტრანსპორტში, სადაც აქამდე 12- დან 15- მდე მგზავრს ათავსებდა, მოათავსოს მხოლოდ 6 მგზავრი და დაიცვას უსაფრთხოების ყველა ნორმა“,- განაცხადა ქადაგიშვილმა.
მთავრობისა და რეგიონული შტაბის მიერ დადგენილ რეგულაციებს ზედამხედველობას კახეთში, პოლიციის, ჯანდაცვის, სოფლის მეურნეობისა და შესაბამისი მუნიციპალიტეტების მაკონტროლებელი ორგანოები გაუწევენ.
კახეთის სამხარეო ადმინისტრაციასა და მუნიციპალიტეტებში ამოქმედდა ცხელი ხაზი, რომელზე კონტაქტიც ყველა დაინტერსებულ პირს შეეძლება.
რეგიონული ოპერატიული შტაბი, კახეთში, გუშინ, ქვეყანაში სრული კარანტინისა და კომენდანტის საათის შემოღების შემდეგ შეიქმნა.
შეგახსენებთ, დღევანდელი მდგომარეობით, კახეთში ახალი კორონავირუსის დადასტურებული შემთხვევა არ გამოვლენილა.
ამ დროის მონაცემებით, საქართველოში COVID-19-ით ინფიცირების 110 შემთხვევა დადასტურდა.
- 31 მარტის მდგომარეობით გამოჯანმრთელდა 21 ადამიანი.
- 28 მარტს გამკაცრდა საკარანტინო რეჟიმი სამეგრელოსა და ზემო სვანეთში.
- 23 მარტს, მთავრობის უწყებათშორისი საკოორდინაციო საბჭოს გადაწყვეტილებით, მარნეული და ბოლნისი მთლიანად ჩაიკეტა
- 21 მარტს, პრეზიდენტმა საქართველოს მთელ ტერიტორიაზე საგანგებო მდგომარეობა გამოაცხადა.
- საქართველოს ყველა მოქალაქე, რომელიც ქვეყანაში შემოვა, საკარანტინო ზონაში მოთავსდება.
- მთავრობის გადაწყვეტილებით, საქართველოში სასურსათო მაღაზიების, ბენზინგასამართი სადგურების, კვების ობიექტების, ღია საკოლმეურნეო ბაზრების და აფთიაქების გარდა ყველა სავაჭრო ობიექტი დაიხურა.
- შექმნილი მდგომარეობიდან გამომდინარე, სამარშრუტო ტაქსების მოძრაობა აიკრძალა.
- შეზღუდვები შეეხო კაფე-ბარებსა და რესტორნებს.
ავტორი: ხათუნა გულიაშვილი
