ეს ხდება იმ ინფორმაციის გადასაფარად, რაც თუნდაც დღეს პარლამენტში იხილება, – ასე აფასებს პარლამენტის ვიცე-სპიკერი გია ვოლსკი, პრემიერ-მინისტრის გიორგი გახარიას თანამდებობის დატოვებასთან დაკავშირებით გავრცელებულ ინფორმაციას.
ვოლსკის თქმით, ყოველი არჩევნების წინ ამორჩეული პიროვნება, რომლის მიმართ მიდის ინფორმაციული შეტევა.
„ეს ხდება იმ ინფორმაციის გადასაფარად, რაც თუნდაც დღეს პარლამენტში იხილება. საუბარია ევროსასამართლოს გადაწყვეტილებაზე, რომელიც უმძიმეს დანაშაულებებზე „ნაცმოძრაობის” პერიოდის პასუხისმგებლობას ითვალისწინებს, რაზეც ფული ჩვენ ბიუჯეტიდან უნდა გადავიხადოთ. ამის გადაფარვა მიდის. სხვა მნიშვნელოვანი თემების გადაფარვაც მიდის”, – განაცხადა ვოლსკიმ.
ცნობისთვის, „მთავარი არხის“ მიერ გავრცელებული ინფორმაციის თანახმად, გიორგი გახარია თანამდებობას ტოვებს.
არხის ინფორმაციით, მას გადადგომაზე პარტიის თავმჯდომარე, ბიძინა ივანიშვილი ელაპარაკა, თავად გიორგი გახარია კი წინააღმდეგი იყო.
ინფორმაციას არ ადასტურებს დედაქალაქის მერი კახა კალაძე.
