სახალხო დამცველი, ნინო ლომჯარია გავრცელებულ ვიდეოჩანაწერს ეხმაურება, სადაც ჟურნალისტი, პრემიერ-მინისტრის არასრულწლოვან შვილებს ვიდეოს უღებს და მათგან ინტერვიუს აღებას ცდილობს.
ნინო ლომჯარიას თქმით, დაუშვებელია ბავშვების პირად და ოჯახურ ცხოვრებაში ჩარევა.
„რაოდენ ობიექტური და სამართლიანი პრეტენზიები არ უნდა არსებობდეს კონკრეტული საჯარო პირების მიმართ, მოვლენების გაშუქების თუ პროტესტის გამოხატვის დროს აუცილებელია დაცული იყოს მათი არასრულწლოვანი ოჯახის წევრების საუკეთესო ინტერესები“,- აცხადებს სახალხო დამცველი ნინო ლომჯარია.
„დაუშვებელია და სცილდება საჯარო მოხელეთა და მათი ოჯახების თმენის ვალდებულებას ბავშვების პირად და ოჯახურ ცხოვრებაში ჩარევა, ყოველდღიური ცხოვრების დეტალების გაშუქება მათი თანხმობის გარეშე, რაც სცილდება ობიექტური ინტერესის ფარგლებს.
შესაბამისად, მედია საშუალებების წარმომადგენლებს მოვუწოდებ, ინფორმაციის მოპოვებისა და საკითხის გაშუქების დროს პატივი სცენ ბავშვების პირადი ცხოვრების ხელშეუხებლობას და იმოქმედონ ჟურნალისტური ეთიკის სტანდარტების დაცვით“,- ამბობს სახალხო დამცველი.
