ბათუმში მცხოვრები მოქმედი ადვოკატი ირწმუნება, რომ უკვე 25 წელია, რაც ცოლისგან ფსიქოლოგიური და ეკონომიური ძალადობის მსხვერპლია. ამბობს, რომ რამდენჯერმე გამოიძახა პოლიცია, თუმცა სახელმწიფო მის უფლებებს სათანადოდ არ იცავს. აღსანიშნავია ის ფაქტი, რომ წყვილი განქორწინებულია, თუმცა მაინც ერთ ჭერქვეშ ცხოვრობს.
ქალის მიმართ შემაკავებელი ორდერი სულ 5-ჯერ არის გამოწერილი, სამჯერ კი სისხლის სამართლის საქმეა აღძრული. მათი კონფლიქტი პანდემიის პერიოდმა უფრო გააღვივა.
AMBEBI.GE-სთან საუბრობს დაზარალებული და განმარტავს, რატომ დასჭირდა პოლიციის გამოძახება:
ეს იყო ჩვეულებივი ძალადობის ერთ-ერთი ეპიზოდი. დასახმარებლად გამოვიძახე და ჩემს წინააღმდეგ გამოწერეს შემაკავებელი ორდერი. მაშინ როცა მე ვჩიოდი და მე ვიყავი მსხვერპლი. დამიცვა ჩემმა კოლეგამ, ლელა ბჟალავამ. არ მქონდა იმედი რომ მოსამართლე ჩემს სასარგებლო გადაწყვეტილებას გამოიტანდა, მაგრამ ვერ გაექცა ამ რეალობას და მე გამამართლა.
სულ 5 ჯერ არის მის წინააღმდეგ შემაკავებელი ორდერი გამოწერილი და სამჯერ სისხლის სამართლის საქმეც აღიძრა, მაგრამ არ ჩერდება. ერთი ჩემოდანი სავსე დოკუმენტები მაქვს.
ამ პანდემიის დროს ხშირად ვიძახებდი სასწრაფოსაც ისეთი სიტუაცია იყო… სულ სერიალების ყურებაშია 24 საათი, სხვა არაფერი აინტერესებს, ამოვიდა ყელში ეს სერიალები, მე მაინტერესებს ქვეყანაში და მსოფლიოში რა ხდება და იმიტომაც მეჩხუბებოდა საინფორმაციოს რატომ უყურებო.
ძალიან შეშინებული ვიყავი ამ კორონას გამო, სახლიდან ყოველ გასვლაზე და შემოსვლაზე ტანსაცმელს სპირტით ვამუშავებდი, მას რომ წესების დაცვას ვთხოვდი, დამცინოდა…. ადვოკატი რომ ვერ დაიცავ თავს, სხვა ადამიანი როგორ დაიცავს თავს ასეთი ძალადობებისგან“, – ამბობს მამაკაცი.
თავად მოსარჩელის ცოლი კი თავის ჩვენებაში განმარტავს, რომ ყოფით ნიადაგზე ხდება კონფლიქტები და კონფლიქტის საგანი არა კორონავირუსი, არამედ ისაა, რომ მამაკაცი ტელევიზორს არ სცილდება. მ.ხ. დაკითხვის დროს აღნიშნავდა, რომ მისი ყოფილი მეუღლე სისტემატურად, უწყვეტად უყურებს საინფორმაციო გამოშვებებს, რაც ოჯახის დანარჩენი წევრებისთვის მიუღებელია.
წყარო: ambebi.ge
