რამდენიმე წუთის წინ, გლდანის ციხის ეზოში ავტომობილების კოლონა შევიდა, რომელთა შემადგენლობაშიც იყვნენ როგორც სასწრაფო დახმარების ბრიგადები, ასევე მეხანძრეების და მაშველების სპეციალური და ე.წ. ჭავლის მანქანები. ტერიტორიაზე შევიდა 3 სატვირთო ავტომობილიც, თუმცა რითი იყო ეს ავტომობილები დატვირთული – უცნობია.
პენიტენციური დაწესებულების მეორე მხრიდან კი, შენობაში ამწეთი სამედიცინო აღჭურვილობა შეიტანეს.
ადგილზე მივიდა სახალხო დამცველის სპეციალური წარმომადგენელი.
ციხიდან ციხის საავადმყოფოში – მოვლენების ეპიცენტრი რუსთავის ნაცვლად გლდანი ხდება. მიხეილ სააკაშვილის ახალი ლოკაცია მე-18 სამკურნალო დაწესებულებაა.
ექსპრეზიდენტის ტრანსპორტირება რუსთავის ციხიდან ვერტმფრენით მოხდა. რის შემდეგაც გლდანის ციხის ტერიტორიაზე უსაფრთხოების ზომების გაძლიერება დაიწყო.
ტერიტორიაზე შეყვანილია სპეცრაზმი და დამატებითი საპოლიციო ძალები. დაკავებიდან 39-ე დღეს ყოფილი პრეზიდენტის სამედიცინო დაწესებულებაში გადაყვანის გადაწყვეტილება დღეს კონსილიუმმა მიიღო.
