გიორგი კეკელიძე ნათელა გრიგალაშვილთან ერთად აგრძელებს დოკუმენტური ფილმების სერიის გადაღებას, თუ როგორ ცხოვრობენ უბრალო, რიგითი ადამიანები, როგორ ცდილობენ თავიანთი მოსაწყენი ცხოვრება გახადონ საინტერესო.
ტანდემმა უკვე გადაიღო და საზოგადოებას წარუდგინა ამ სერიის პირველი ფილმი – “ზურიკოს კალანდა“, რომელიც გურიაში, ძველით ახალ წელს გადაიღეს.
ამჯერად, გიორგი ნათელასთან ერთად მაღალმთიან აჭარაში გადაღებულ ფილმს “იაკობის ცეკვას” წარმოგვიდგენს. ფილმი მონტაჟის ეტაპზეა.
გიორგი კეკელიძე: – იაკობ ადაძე ხულოს უხუცესთა ქორეოგრაფიული ანსამბლ “ბერმუხას” წევრია. ის პანდემიამ სახლში გამოკეტა, მაღალ მთაში, სოფელ მეკეიძეებში. ცდილობს პანდემიას შრომით და ცეკვით გაუმკლავდეს. მაგრამ როცა ცეკვა მოწყურდება, ასე თოვლში მართავს რეპეტიციას. ან რეპეტიციას რატომ, თუნდაც კონცერტსაც.
ესეც ფრაგმენტი ამ დიდი კონცერტიდან, ერთი შემსრულებლით და უმაყურებლოდ. ამ ძალას სხვა ვარჯიში სჭირდება, სხვა ილეთები. ეს გულის ილეთებია – მერე კარნახობს გარესხეულს.
ეს ემოციურია, ის მხოლოდ აუდიტორიისთვის არ ცეკვავს. ის, პირველ რიგში, საკუთარი თავისთვის ცეკვავს.
