რა შეიძლება გავაკეთოთ იმისთვის, რომ ინფიცირების გამო დაკარგული გემოსა და ყნოსვის ფუნქცია დროულად აღდგეს – ამის შესახებ ექიმი ნანა გეგეჭკორი საუბრობს და საზოგადოებას შემდეგ რჩევებს აძლევს.
„სამწუხაროდ, ჯერჯერობით არ გვაქვს რამე კონკრეტული პრეპარატი, რომელიც მიმართულია გემოსა და ყნოსვის ეფექტურ აღდგენაზე, თუმცა არის სხვადასხვა მიმართულება, რომელიც ახლა მუშავდება.
დღეისთვის, ყველაზე ეფექტურად ყნოსვის ვარჯიში ითვლება. უნდა აიღოთ 4 სხვადასხვა ტიპის სურნელი, ეს სურნელები სპეციალურადაა შერჩეული იმის მიხედვით, რა ტიპის ყნოსვის რეცეპტორები არსებობს და რა ტიპის არის ზოგადად ყნოსვა – ვარდის, მიხაკ-დარიჩინის, ევკალიპტის და ლიმონის სურნელებია შერჩეული. ყოველ დღე ივარჯიშეთ. 10-20 წამის განმავლობაში შეისუნთქეთ თითოეული მათგანი ღრმა ჩასუნთქვით. ეს მოქმედებები დღეში 2-ჯერ გაიმეორეთ. დაახლოებით, 2-3-თვიანი ვარჯიშის შემდგომ ყნოსვა და გემოს შეგრძნება დაბრუნდება.
ყნოსვა და მეხსიერება ძალიან მჭიდროდ არიან ერთმანეთთან დაკავშირებული, ამიტომ ვარჯიშის დროს ეცადეთ და გაიხსენეთ და იფიქრეთ სურნელზე, რომელსაც დაკარგვამდე გრძნობდით.
ასევე, გარკვეული მონაცემებია A ვიტამინის წვეთებზე, რომელიც სპეციალურად ცხვირისთვის გამოიყენება, შესაძლოა ის დაეხმაროს აღდგენაში, ასევე omega3 ტაბლეტების ან კაფსულების სახით. თუმცა, კვლევები დასრულებული არ არის და ზუსტი მონაცემებიც არ არსებობს“, – ამბობს ექიმი „მთავარის“ დილის გადაცემაში.
