საკონსტიტუციო ცვლილებებს უკვე აქვს ოპოზიციის მხარდაჭერა ჩვენი და „დამოუკიდებელი დეპუტატების“ სახით,- ამის შესახებ „პატრიოტთა ალიანსის“ ლიდერმა, საქართველოს პარლამენტის ვიცე-სპიკერმა, ირმა ინაშვილმა განაცხადა.
როგორც მან საკონსტიტუციო ცვლილებების საყოველთაო-სახალხო განხილვისას განაცხადა, ყველას კარგად აქვს გაცნობიერებული, საკონსტიტუციო ცვლილებების ჩავარდნას რა შედეგები შეიძლება მოჰყვეს.
„თუ თქვენს გუნდში რაღაც არ ხდება კიდევ, მორიგი რაღაც არ იგეგმება, უბედურება თუ მელაკუდობა, თუ პოლიტიკური სპექტაკლი, მაშინ ჩვენ გვაქვს საშუალება, რომ გავიტანოთ ეს ცვლილებები.
ჩვენ ყველამ ერთად უნდა ავიღოთ პასუხისმგებლობა, რომ გავიტანთ ამ ცვლილებებს“, – განაცხადა ირმა ინაშვილმა.
ახალ საარჩევნო სისტემასთან დაკავშირებული საკონსტიტუციო ცვლილებების საყოველთაო-სახალხო განხილვის პირველ სატელევიზიო შეხვედრას საზოგადოებრივი მაუწყებლის „1 არხი“ მასპინძლობს.
განხილვის პროცესში არ მონაწილეობენ ბოიკოტის რეჟიმში მყოფი საპარლამენტო ოპოზიციური პარტიები – „ნაციონალური მოძრაობა“ და „ევროპული საქართველო“.
